綠茶餐廳 (圍方)

营业中

休息中

见大围开咗间绿茶，上网search 话系内地人均消费约$50，但今餐两人食咗$450。叫咗龙井烤鸡，五花肉炒鹿茸菌，虾汤泡饭。烤鸡尺寸系春鸡，冇鸡味，冇茶味，饭脚话稻香壹蚊鸡仲好食过佢。会先摆底俾你影相再拎走剪开。 只鸡剪到乳鸽咁，一开四，不方便食用。 五花肉炒鹿茸菌，油比较多，但都惹味。 虾汤泡饭就咁汤饭，似罐头龙虾汤捞饭。之后讲服务，未食过大陆个间唔知服务有几好，但香港真系真系麻麻，6:30入座，入座时提及1小时30分钟用膳时间，等菜用咗10分钟，食咗15分钟侍应已过嚟收嘢，因为只鸡已经食完，所以我都冇反对收碟，但冇谂过，碟五花肉炒鹿茸菌只系食咗1/3佢都收埋我，因为佢好快咁拎起碟鸡就放落碟五花肉度，收走，因为太突如其来，同埋碟五花肉都俾佢污染咗，拎返都食唔到。 收完碟转头已经又走过嚟收埋个汤饭同我哋啲碗同筷子，好彩我已经𢳂起咗啲汤饭，由到菜到被人收餐具只系20分钟左右，唔系话用餐时间个半钟咩？ 你咁赶我走，好我走，侍应见我准备走，即刻企系隔离等执枱。但可以俾小小时间我着埋件外套同揹返个袋先吗？ 见佢哋咁赶人走，以为好多人排紧，点知出边跟本冇人等紧，体验非常差，价钱偏贵，冇下次。