有錢佬靚粥 (已結業)

到底堂食个砂锅定外卖个碗嘅容量大啲呢？呢个问题已经喺我屋企热议咗两镬。事关我哋一家四口次次都系嗌外卖，每次要4-6个粥全家食；有次行过见到堂食啲粥系用砂锅，感觉上size好似大啲（而且非常滚热辣好正咁）作为悭家急先锋嘅我为咗找出事实真谛，当仁不让，前日专程同阿爸阿妈细佬再去堂食番转，亲身求证下。一坐低就叫咗个招牌粥(最钟意食呢个粥），细佬食葱爆牛肉粥，阿妈嗌虫草花醉鸡，老豆就食济洲蚝肉碎粥，全部都系新嘢。另外仲嗌咗啲同求证事实无关嘅小食，包括煎虾米肠、萝卜糕、饺子同虾饼。啲小食煎得好香脆，值得一提嘅系个饺子配左店家特制嘅香醋之后出奇地好味。食完之后我哋就开始讨论，我同细佬觉得砂锅好似系大啲，但阿爸阿妈就话唔觉㖞。正当我地七嘴八舌之际，店员就行过嚟同我地讲其实两者嘅容量系一样嘅，佢哋一早已经度过晒。噢...得知悭唔到钱后有种淡淡嘅失落，算啦，啲嘢好食就得喇！