餃掂手工餃子雲吞專門店

好味饺子专门店！之前喺湾仔试过呢间嘅饺子店，觉得几好味。喺坚尼地城再帮衬多几次，觉得佢嘅汤冇乜味精，唔错！饺子嘅质素都保持到一贯嘅水准，又有唔同嘅口味选择，上菜速度都几快。枱面上仲有酸萝卜提供可以夹住饺子一齐食，非常推介！寿喜烧牛肉饺10只$72- 呢款牛肉饺子比较特别，寿喜烧汁调味会重啲，偏咸。馅料充满肉汁，食到牛嘅味道，相比起猪肉饺，肉质会实啲。食一啖饺子，呷一啖汤，刚刚好。大白菜猪肉饺10只$56- 大白菜普通左啲，冇乜特别。芫荽猪肉饺10只$61- 如果钟意食芫荽，我极力推介呢款饺子！非常重芫荽香味，馅料好饱满，好味道！一个人食晒10只都完全冇问题。香煎软心芝士饺10只$68- 我建议煎饺可以同朋友share，呢度煎得油腻咗啲，饺子皮煎得香脆，但都沾上唔少油，加上软心芝士都比较腻。芝士味道咸香，同普通猪肉汤饺完全唔同食法，值得一试。大满贯素饺10只$66- 因为素饺只有焯饺，唔会跟汤，所以转軚试吓煎饺。素菜馅料都几饱满，落重麻油，比较油腻，不过口感都几爽口。