韓日屋燒烤放題 (已結業)

返工压力大，放工要将压力化为食量，就选择左去食放题。见附近有间又有烧烤又有日式放题嘅餐厅，一次过满足晒2个愿望，即刻去试下先。呢度原来收费系可以只食烧烤，再加30蚊就可食埋日式放题，收费都好有弹性。坐底先睇下有乜食，款式比我预期多好多。根本就系韩式烧烤加日式放题嘅食物款式都可以系度揾到，唔会因为二合一就牺牲左款式。先叫个刺身，刺身款式选择多，刺身质素尚可，甜虾细只但鲜甜。第二回合就系烧烤，烧左好多唔知乜野部位嘅牛肉，最好味都系牛肋骨。牛肋骨肉质超林，牛肉唔使点汁都己经够味，再用生菜包住食，即刻无咁热气，超正。另外比较有特色嘅系烧蚝，呢度系用个锡碗仔烧黎食，冇乜见其他地方有。蚝都唔系细只，鲜甜，再加上蒜蓉，又系要加单。重有好多唔同嘅熟食，好似炒蚬，炒螺，天妇罗咁，全部都不过不失。最后重有雪米糍同雪糕。胃口细D都食唔晒。