Vive Cake Boutique (已結業)

其实早喺四月尾已留意到利东街将会有新蛋糕店「Vive Cake Boutique」登场。等到五月二十七号，终于盼到店子开张。「Vive」用上云石打造o既外墙配上店内以粉红色为主o既装潢，柔和得黎大方雅丽。落地玻璃身后o既蛋糕模型以高高o既云石枱承起，配上简洁o既圆枱散座，感觉清爽企理。正门旁摆放o既镇店蛋糕模型更是吸引动人，途人路过都不禁行近望多两眼。收银处有两个雪柜，其中细小𠮶个雪柜陈列出精致o既迷你蛋糕仔及马卡龙。柜面仲有束靓靓o既鲜花衬托埋，四周都流露出高贵o既气质。埋喺墙身较大o既雪柜则摆出原装大细o既蛋糕及饮品。小肥其实一早已喺网页上拣好想订「Summer Flourish」（夏日缤纷）送俾长辈贺寿。不过循例都向两位靓女姐姐索取单张，参阅一番。店员虽然系生手咗少少，不过胜在态度友善，笑容满脸，客套有礼。由于新店仍属试业阶段，付款后发票要经电邮后补。哗，除咗蛋糕外观精美，高高o既粉红粉白硬身纸袋以银字熨出店名，再加配银色蜡烛，就连包装都一样咁有睇头。Summer Flourish（夏日缤纷） - Layered Sponge Cake in White Peach Mousse