元気寿司 (屯門市廣場1期)

营业中

休息中

老婆生病了😷，费事佢煮饭辛苦，就建议哩一两日买外卖算数。最后预早一日订咗元气寿司🍣。我哋叫咗特选寿司盛C，原价$133，但咁啱佢做紧网上订购外卖自取优惠，减$14，盛惠$119。另外，我哋仲加咗大切三文鱼腩寿司$20、腐皮寿司$12同飞鱼籽军舰$12各一客。特选寿司盛C都算抵食，里面有带子寿司、赤海虾寿司、甜虾寿司、三文鱼寿司、三文鱼沙律军舰各两件，及蟹籽寿司同赤贝寿司各一件，总共12件。真系估佢唔到，我哋最欣赏嘅竟然系三文鱼沙律军舰，唔知系咪加咗沙律酱，所以觉得特别惹味，三文鱼食落亦更加肥美嫩滑弹牙。带子寿司都唔错，厚身结实，味道新鲜甘甜，无乜腥味。三文鱼就比较失色，薄身之余，食落亦比较干身嚡口。其他都不错👌🏼。大切三文鱼腩寿司亦比较失色，肉质较结实，唔够肥美，无乜鱼油香味，亦无入口即溶嘅感觉。腐皮同飞鱼籽寿司则正常发挥，新鲜好食。