Pop Street (已結業)

随住西港岛线开通，近几年西营盘站周围开咗唔少餐厅，cafe同bar。今日去到附近，见到Pop Street门面几吸引，骤眼睇餐牌都几多选择，所以去咗叹个lunch。Lunch有8个set，我叫咗纽西兰鳕鱼柳汉堡配薯条($58)，会送特色小食同饮品。客人比较多，所以等咗一阵先有得食，但等待系值得嘅，因为个set每部分都系落足心机泡制嘅。个汉堡好足料，冇谂过件炸鳕鱼柳会咁厚，外层仲系脆卜卜，里面嘅鱼肉晶莹剔透，好多汁。他他酱同蔬菜好清爽。薯条啱啱炸起，仲系热辣辣嘅，非常香。特色小食仲以为会系沙律果d，点知系港式肠粉，真系估佢唔到，不过用嘅调味料有少少咸。而饮品可以拣茶啡汽水，或者是日凉茶。凉茶唔通系黑色苦苦地果种？同间餐厅一d都唔match㖞。问过侍应，原来系佢地餐厅因应每日天气，朝早就开始煲嘅凉茶。今日煲嘅类似系甘菊茶，饮落甘甜，食完炸野最啱润喉，而家天气咁干燥，饮完仲可以护肤养颜。佢地仲响应环保，提供金属饮管。其他lunch set都值得去试：日式芝麻汁手撕鸡荞麦面，越式香茅猪肉丝法包，意式金菇忌廉汁扁面，巴西辣肉肠黑豆饭，摩洛哥烧春鸡，四川麻辣海鲜扁面，港式叉烧饭。