上美點

营业中

休息中

做完野，顺便买啲外卖返去食，盅头饭同蒸包呢类外卖点心店系近期嘅常客，一来方便，二来价钱平又几多野拣。未食过上美点今日就试下佢啦，见佢都不停有人去买应该有保证。点心同盅头饭都有每日特价款式，十几廿蚊就有交易了。两口子食，就叫左五样点心同一盒饭，无上茶楼好耐，叫啲点心解下口腹。冬季限定嘅糯米饭，料就无乜㗎啦，但饭几香口够烟韧，而且唔油腻，大大盒㗎，一人半盒都好饱肚。炸韭菜角几脆㖞，劲多韭菜，可惜冻左，新炸起应该好正。鸡扎大大旧，入面包左芋头，猪皮，火腿同鸡脾肉，味道正常，呢个价钱收货有余。烧卖都几好，半肥瘦食落有口感。牛肉球好味㖞，有芫荽马碲等一啲都唔hea，可惜屋企无喼汁，少左啲神韵。仲有鹌鹑蛋烧卖，呢样茶楼已经无得食，得返点心舖咋，下面旧肉几弹牙鲜味吖，好味。自己冲壶茶叹下点心，唔错唔错。