老四火鍋小廚

营业中

休息中

同好姊妹吹水之夜，只要同呢个好姊妹出街就会口水多过茶， 所以为左唔好影响其他人，我地今晚决定去大排档食。一来叫左个麻辣墨鱼头，麻辣味几出，入口dd 麻后劲带点辣，墨鱼头好爽，底下的云耳吸收哂d 麻辣汁，辣得够过瘾，最正系佢可能惊大家过份刺激系上面放左d 中华沙律配搭，减轻辣度。油鸭西洋菜煲， 都煮得唔错油鸭的油脂比西洋菜吸收哂变得菜更香甜，油鸭亦唔会过咸呢个食法我几钟意。我个朋友最钟意食菜，我地觉得只得一个菜唔够喉，所以叫多个啫啫生菜煲， 送到来时仲唦唦声，用左猪肉碎虾干去爆过真系好唔同特别惹味生菜炒得唔过火仲系好爽脆甜。系大排档食野真系可以好尽兴，食物够镬气，份量又大， 你睇我今晚叫的“生炒海味糯米饭” 份量超多，入面有好多虾米腊肠润肠等材料，最特别系加左菜脯去炒更加香，糯米饭口感好软糯，凉凉地食，食完真系好温暖。