花椒八角

营业中

休息中

母亲节咁啱系星期日放假，所以特登带屋企人出咗去远少少既地方行下。个日入咗东涌搭缆车入昂坪市集顺便行天坛大佛，回程个阵咁啱见到呢间川菜，餐厅出面睇落唔似食川菜，出面有啲椰子树比人感觉好悠闲，餐厅入面原来内里干坤，风格系走怀旧香港，几有特色，而且空间够大个人坐得舒服。我同我屋企人唔系话好肚饿，所以叫咗几份凉菜小食麻辣口水鸡、酸辣秋葵，虽然话系小食但份量十足！啲菜上得好快，只口水鸡啖啖肉同埋够嫩，同埋无冰鲜鸡个种雪味，够晒麻，略嫌佢少咸，要𩠌饭食就啱啱好！酸辣秋葵我就第一次试，出面唔系间间川菜都有，平时出面食得多酸辣青瓜，今次试下呢个秋葵，出奇地比青瓜好食，一样咁爽口同埋个酸辣汁够开胃，而且够冻，食完会想再食！价钱方面，虽然少贵，但味道同份量都值回票价。间餐厅除咗有地道既川菜，仲有得烧烤同打边炉， 有机会再嚟试下佢呢度既酸菜鱼同辣子鸡。