太極樓京滬飯店 (已結業)

闲日放假同两位长辈柴湾扫墓后食晏，佢哋拣咗青年广场的太极楼，我哋系第一枱客嚟到啲工作人员仲食紧饭。三个人点咗四人套餐$258另茶芥加一每人约莫一佰蚊松啲，十分平份量亦足不过就一般水平低少少喇。冷盘我哋要咗牛𦟌同猪脚，量多雪味亦多，可能啱啱雪柜攞出嚟，所以肉质口感好硬好嚡下。主菜㰓菜四季豆，豆荚爽脆咸淡适中。狮子头就麻麻哋，水份多肉质过软，老人家啱食，所以两个长辈话晤错，我就过多廿零卅年先识欣赏。糖醋鱼块，鱼块冇雪味，口感唔错，不过菠萝居然完全没有味道很奇怪。小吃原来比较好食，生煎包馅料有肉汁，个底都脆，算系咁。小笼包d皮有点干，馅料尚可有肉汁，唔系太差。餐后仲有几嚿橙送同埋四杯饮品，我哋已经开咗茶其实饮唔落其他嘢，所以外带，工作人员都好友善帮手包走。长辈话下次试客饭，卅几蚊加茶芥加一，仲平过脆华，可以谂下。