炊豕店 (加路連山道) (已結業)

由于小妹返工返港岛区，所以放工不时都会去铜锣湾食好西，特别系加路连山道，称得上系美食集中地👍🏻上星期同友人去咗炊豕店，平时成日都见排长龙，好彩今次早去，等咗５分钟就入得。舖头比较细，坐到20个人左右，座位有啲迫，装饰几有台湾复古感觉。一早听闻呢度猪扒又大份又多汁，我哋两个人分别点咗招牌葱油猪扒饭（加配煎蛋同午餐肉）、大阪烧猪扒捞幼面、肉燥冻豆腐，同埋一支橙汁。嘢食好快到，一上枱被佢个巨量size吓亲！葱油猪扒好惹味，外脆内软，块午餐肉仲要系炸，劲邪恶但忍唔住一啖接一啖咁食。大阪烧猪扒都好好食，同平时日本餐厅食个味无咩分别，猪扒有成五六块。幼面几烟韧，份量多到我打包做第二日饭盒。肉燥冻豆腐可以解济，不错不错。埋单每人$90都唔使，饱到上心口。其实menu上仲有好多嘢都想食，下次放工再嚟过。