大吉居酒屋 (已結業)

最近听朋友讲以前成日去食中环𠮶间大吉放题转咗做居酒屋，今日同妈咪过嚟试下先。基本上装修都无咩点变，同以前差不多，只系menu转咗，分为几大类别，有沙律🥗、前菜、刺身寿司🍣、卷物、烧物、一品料理、食事同埋锅物🥘。妈咪至爱食鱼刺身，所以拣咗个油甘鱼同吞拿鱼刺身，入口软身，非常新鲜，完全无半点腥味。我哋仲叫咗个软壳蟹🦀沙律🥗，又松又脆，咬落亦唔会一口油，配埋沙律食带点清新口味，蔬菜又新鲜爽口。盐烧手羽外表金黄，表面焗得够干身，但肉汁依然保留，带点点盐烧香味，正呀！😍另外我哋拣咗店员极力推介嘅蟹肉🦀忌廉可乐饼，果然无介绍错，外表炸到卜卜脆，粉浆唔会话太厚，咬开系热辣辣嘅忌廉蟹肉，带有少量可乐味，甜甜哋，味道好好，绝对值得一试。大家下次如果想同朋友揾间居酒屋食下嘢倾下计，不妨可以考虑下嚟呢度。