風車

营业中

休息中

星期六嘅下昼，陪屋企人去大围睇牙医，顺便就喺附近睇吓有乜嘢好食，无意中就系距离大围火车站大概三条街距离左右，见到呢一间西餐厅，见到餐牌都好似几抵食， $60-$70就有一个lunch set，包晒前菜主菜同埋饮品，一于决定试吓啦！几欣赏佢嘅就系，餐牌上边有素食嘅选择，可以切合唔同人嘅需要。我哋分别要咗一个卡邦尼意粉，同埋一个素菜千层面，前菜就一个要沙律，一个要咗是日嘅餐汤，而今日就系南瓜汤。南瓜汤应该都落咗好多忌廉或者牛奶去煮，所以都几香滑㗎，以呢个价钱来讲，已经好OK。卡邦尼泊尔意粉就正常水准，份量都唔细，烟肉嘅份量都唔少。而素菜千层面嘅份量就比较大，中间就冇平时食开嘅肉碎，主要由番茄酱同埋翠玉瓜做馅料，另外仲配有炸薯角个同埋蔬菜沙律，对素食者来讲都系一个几唔错嘅选择嚟㗎。饮品方便，就要左一杯热嘅水果茶，另一杯就加钱要咗杯爆谷味咖啡，水果茶正正常常，咖啡就反而几令人surprise，爆谷味同埋焦糖嘅甜味都几重，冇谂过呢度都可以饮到呢一种味道嘅咖啡。餐厅细细地，座位唔算太多，但都算坐得阔落，如果去开大围的话，都可以嚟呢度试吓嘅。