風車

营业中

休息中

今日去大围探朋友，佢话食过呢间餐厅几次，觉得唔错，所以今日带咗我嚟试。「风车」嘅环境好chill，盏水晶灯好靓，仲有得睇波添。我哋总共叫咗四样嘢食。第一样系蟹肉饼，食落啖啖蟹肉，好足料、饼嘅表面煎得脆，仲有醋汁沙律菜做配菜，好开胃。第二样系蒜香虾多士，呢个虾多士同平时出面嘅餐厅有啲分别，属于健康版，唔系油炸版。每旧多士有两只大虾，面包烘到好脆。第三样系烤春鸡，好大份，食落有好香嘅柠檬同埋黑椒味，肉质鲜嫩好滑。最后一样系龙虾意粉，我觉得成餐饭最出色嘅就系龙虾意粉，一上菜就闻到好香浓嘅芝士味，意粉亦有唔同嘅配料，例如系鸡髀菇、鸿喜菇、洋葱，口感非常丰富，我哋两个食到一条意粉都冇剩～整体嚟讲，呢间餐厅嘅食物质素唔错，份量都好足够，服务员态度都好友善，令人感到舒服。