影片
更多
2014-03-09
1390 浏览
二月份因为要去亲戚屋企拜年,所以星期六放工后要入大埔晚饭,时间尚早,不如早o的入去大埔行下,当日中午放工后第一站谂住黎大埔熟食中心钦记粉面食招牌鱼蛋粉大埔熟食中心虽然落成好多年,但系之前都未上过去,当日中午放工入到大埔已经要1:30pm,见到熟食中心有多达80档 ,可能系全港最大规模,熟食中心通道会有其他档口店员叫你食其他野架! 我系专程黎钦记粉面,梗系唔会坐低啦,周围睇下先揾到钦记粉面,好彩黎到见到仲开档其实呢个熟食中心有七至八档卖鱼蛋粉,大埔街坊话钦记及洪记最巴闭,钦记做左几十年,佢地o既招牌只有粉面两字,冇写"鱼蛋",证明佢地唔会刻意标榜鱼蛋系佢地招牌食品,相信识食o既人先会黎食黎到钦记见到周围都坐满人,唔太识得点分边张枱属于边间,档口旁边有人排队,第一次黎到有o的不知所措,点解要排队呢?佢地又唔似买外卖,唔通揾到张枱坐低后要再出去排队落单? 见到两位阿姐好专心地轮流用一个铁盘将粉面送到食客枱上,于是问阿姐边张枱系属于佢地,听人讲落单后要等几耐先有得食,咁就梗系快o的揾到位坐低落单,如果唔系鱼蛋真系会卖晒架! 好彩我只系一个人黎,阿姐安排我坐远处一张枱,真系估唔到原来o个张枱都
大埔熟食中心虽然落成好多年,但系之前都未上过去,当日中午放工入到大埔已经要1:30pm,见到熟食中心有多达80档 ,可能系全港最大规模,熟食中心通道会有其他档口店员叫你食其他野架! 我系专程黎钦记粉面,梗系唔会坐低啦,周围睇下先揾到钦记粉面,好彩黎到见到仲开档
其实呢个熟食中心有七至八档卖鱼蛋粉,大埔街坊话钦记及洪记最巴闭,钦记做左几十年,佢地o既招牌只有粉面两字,冇写"鱼蛋",证明佢地唔会刻意标榜鱼蛋系佢地招牌食品,相信识食o既人先会黎食
黎到钦记见到周围都坐满人,唔太识得点分边张枱属于边间,档口旁边有人排队,第一次黎到有o的不知所措,点解要排队呢?佢地又唔似买外卖,唔通揾到张枱坐低后要再出去排队落单? 见到两位阿姐好专心地轮流用一个铁盘将粉面送到食客枱上,于是问阿姐边张枱系属于佢地,听人讲落单后要等几耐先有得食,咁就梗系快o的揾到位坐低落单,如果唔系鱼蛋真系会卖晒架! 好彩我只系一个人黎,阿姐安排我坐远处一张枱,真系估唔到原来o个张枱都属于钦记 之后有个女人问我饮乜野,原来佢系钦记粉面隔离茶水档店员,佢地专卖饮品,而钦记及其他档口就专卖食物,基本上熟食中心o的枱已经分配好边几张枱属于边个档口,大家会见到边张枱多人坐,专卖咖啡奶茶饮品档口,一定要俾其他食客用属于佢地o既多张枱,相信冇乜人黎熟食中心纯粹饮杯野,不过我呢位食客专心食粉面唔叫饮品,可能会令茶水档失望
我揾返钦记职员落单,问佢系唔系有得食鸳鸯,或者大家会觉得奇怪,系唔系饮呀? 鸳鸯有得食咩? 鸳鸯唔系咖啡奶茶,原来系指河粉同埋面两沟,呢种食法几特别,可以同时食河粉又成面,唔洗选择食乜野𩠌呀! 之前听过人讲,黎呢度个个都系食同样o既𩠌,每碗都有齐鱼蛋,炸鱼片及鱼皮,一次过可以试齐三样野 唔似得其他粉面舖,钦记只系卖呢o的野,冇云吞,水饺,牛腩或牛丸呢o的𩠌
钦记o既枱上系冇餐牌,睇到档口墙壁贴左张纸,大家可以选择净粉面米$17,粉面米$26,加底$28,加𩠌$31,净𩠌$32,加𩠌加底$35,所以话大家基本上冇乜选择,最适合有选择困难症o既食客帮衬
之前都知道落单后冇咁快有得食,不过唔紧要,可以利用电话上网消磨时间 钦记每隔一段时间就o系厨房整好几碗,由阿姐用一个铁盘将粉面送到食客枱上,坐系我对面两位食客问点解咁耐仲未有得食,钦记系慢功出细货,即叫即整,好多都市人都唔能够接受等待系生活o既一部份 等多大约10分钟,我o个碗鸳鸯黎到,真系估唔到我会快过同枱几位食客,佢地都早过我落单,全部都系叫河粉,真系整好一碗鱼蛋粉都唔知佢地边个要先,可能因为我点左鸳鸯,比较特别,所以排另一条队,快o的有得食
每碗粉面都落左唔少葱花,见到汤底几清,一于先饮为敬,饮落o的汤好清甜呢碗粉面有五粒鱼蛋,鱼蛋有鱼味,唔会腥,鱼蛋真系超细粒,好似臭丸咁大,钦记系用新鲜门鳝及鲛鱼做鱼蛋,呢o的手打鱼蛋每日限量供应
除左鱼蛋有几块炸鱼片,炸鱼片好食,鱼片系超薄,不过粉面捞埋o既口感好得意
另外有大约四条鱼皮,每碗粉面都有架! 炸鱼皮系用细条门鳝,鱼皮浅啡色,同平时见到黑白色鱼皮系两回事,门鳝近鳍部份几多骨,所以食前要浸一浸汤,若果就咁食就好似食薯片,鱼皮炸到脆晒,一咬就可以食,但大家食落去小心o的,唔好大啖食,咬碎先好食粉面质素一般,大家要记住佢地卖点系鱼蛋
最特别系有碟辣椒油,相当好食,唔似得其他粉面档,每张枱都放一樽任人落,佢地系每碗粉面跟一碟辣椒油,同枱有食客唔落辣椒油,所以叫店员拎返走,我就落左o的辣椒油,唔会辣到好犀利,唔洗饮水解辣虽然咁多人都觉得钦记鱼蛋好食,不过佢地系冇得外卖生鱼蛋俾人拎返屋企打边炉,因为每日制作鱼蛋数量都唔够卖,除非你真系长期熟客,佢地先肯卖$30十五粒鱼蛋俾你,虽然好细粒,但真系好好食!
钦记粉面作风比较低调,主要做熟客街坊生意,唔洗乜野宣传,档口冇餐牌又冇写有乜野𩠌有得食店员会抹干净枱面,不过黎得熟食中心食野,大家唔可以对环境有乜要求,偏偏香港好多美食只会o系熟食中心先至有得食!
当日问过店员,佢地通常下午三点就关门,不过星期六,日比较多客人,大约两点就会卖晒鱼蛋,所以大家有心黎食一定要趁早,如果唔系白行一趟!
成间舖只系单靠卖鱼蛋就可以吸引咁多人去食,尽可以卖晒提早收工,真系巴之闭! 若果以香港$26食到一碗鱼蛋粉黎计,钦记粉面系好好食,日后有机会再去大埔,都可能会再返去食
题外话/补充资料：
钦记系家族经营,收银系大家姐,令人窝心系佢地会同街坊倾计,大埔老街坊话以前试过连续两三日冇开,街坊以为佢地结业,但有一日档口大家姐坐o系茶水档唉声叹气,街坊以为佢地家人不和,原来系冇新鲜鱼黎,做唔到鱼蛋向街坊交代,大家姐就向边位想食鱼蛋客人讲声唔好意思,呢一份精神大家要学,真系令人钦佩,有o的舖头冇新鲜鱼就揾雪鱼代替,又或者冇门鳝就用其他鱼造鱼蛋
(以上食记乃用户个人意见 , 并不代表OpenRice之观点。)
张贴
