岩盤牛扒 ミディアムレア ステーキ (博文街) (已結業)

因为工作关系，嚟到大角咀呢一头揾食。见自己都几耐冇食过呢款即叫即切嘅日式铁板牛扒，所以就拣咗佢。牛板腱 $0.45/1g我拣咗牛板腱食，贪佢油脂均匀，肉质软嫩，落order时可以同店员讲想要几多，之后店员就即刻切牛肉再磅。另外，佢有三款调味选择，有葱油、洋葱油同埋蒜油，我就拣咗浓味蒜油，佢仲会有啲蒜蓉。+$28可以变成套餐，五选三(白饭、沙律、温泉蛋、面豉汤同乌龙茶)，我拣白饭、沙律同埋乌龙茶。俾完钱，会攞到一个电子筹，等店员煎好咗后，通知你拎返。铁板好高温，有成300度，真系够晒热。店员先将牛扒煎到三成熟medium rare, 入面依然粉嫩，控制得几好，之后随自己喜好再系铁板煎。 牛扒厚切，牛板腱无根位，成块都好冧又容易咬，钟意佢嘅软嫩。牛板腱本身已经好香，牛味都重，不过加埋黑椒同岩盐一定更突显味道。成餐啖啖肉，好满足。沙律有好多椰菜丝同萝卜丝，配上麻酱，够味之余可以减腻清热。