月橋正宗越南湯粉

营业中

休息中

太子一间毫不起眼的铺头，就系食正宗越南河粉嘅好地方，今日专程带阿妹嚟帮衬。月桥嘅内陇唔算大，只有几张四人枱，但食客不断。阿妹食招牌火车头配金边粉 ，原来有四款食材，包括牛丸、牛肉、牛展及牛腩。招牌汤底，香气十足，牛丸弹牙，牛肉嫩滑，牛展甘香，而牛腩软淋，阿妹觉得非常好食兼抵食 ，仲话有处身泰国嘅感觉。佢再配一杯特饮咸柠七，只系加九蚊，阿妹话咸柠七咸咸地又有气，可以开声及化痰㖞。我就叫咗一碗牛腩牛展金边粉 ，牛展切得薄身，一片片够爽口弹牙，冇靭嘅感觉；相对牛腩就大大件，较厚身，有嚼劲，而汤有清香牛肉味，一边食住金边粉，一边饮啖清汤，好夹。对于大胃王嘅男士就非常适合，因为无论材料或者金边份都好大份，非常饱肚。两人再叫咗个越式炸虾饼， 系即叫即炸嘅，颜色好靓，系金黄色，好吸引食欲，香气四溢，急不及待放入口，热热地零舍好味有鲜虾嘅甜味，爽弹之余又脆香，我大力推荐呢个小食，阿妹都竖起手指大赞。我跟餐就点咗椰汁红豆冰，好香椰汁味，加埋淋身红豆粒粒，香甜好饮。阿妹话下次阿哥再请食饭嘅时候，都会再考虑返㖊味。