京都製パン処 松栄庵 (已結業)

以前返工日日都去北角，轉左工後十年都唔去一次，咁啱過左黎AIA開會，開完會又鬼死咁肚餓，喺樓下東海堂又得啲大大包面包，一個人食實食唔晒。諗起以前AIA對面好似有間壽司，過左對面睇原來轉左做呢間麵包店。個人對綠茶紅豆呢個配搭無乜定力，一見到就買左一個綠茶紅豆包(其實我唔記得左佢叫咩名，因為喺門口張poster見到好吸引就二話不說買！)一咬落口好有綠茶味，雖然唔係新鮮出爐但個包都好鬆軟。咬到中間仲有好大粒紅豆！真係好大粒，最鐘意佢唔係用罐頭嘅紅豆蓉。整體黎講唔記得10蚊定12蚊個包唔平，但好過用同一價錢買大集團麵包店嘅包啦。