御前大江戶日式料理 (已結業)

一连几个大节日，有晚就同人去咗观塘嘅御前大江户食放题，电梯大堂布置成日本江户时代嘅街道咁好得意。因为啱啱等入场𠮶阵太多人，趁食客入晒场就影下先。入面嘅装修同电梯大堂首尾呼应，仲挂咗纸灯笼粉饰一番。每台都有气体炉，可以一边矶烧海鲜，一边食刺身等等日式料理。呢度唔系传统剔纸仔，而系用平板电脑叫嘢食，好处系唔会出现举手冇人理嘅情况，仲可以翻查纪录，睇下自己叫过乜嘢食。先嚟嘅系按人头配额嘅海鲜，蚝同帆立贝虽然外壳开得唔太好有少少岩岩巉巉，不过都几大只。大蚬同海虾等等就系任点任食嘅。台上仲有张说明书，列出唔同食材嘅矶烧方法同时间。每只大蚬都好肥大。我哋仲食咗啲寿司同其他嘢，海胆黄金虾、焦糖芝士三文鱼腩、黑松露北海道带子、芝士皇帝蟹棒，我就比较钟意黑松露北海道带子，黑松露味好浓郁。海胆手卷同软壳蟹手卷都系一口嘅大小，每个手卷入面嘅海胆份量都唔少，冇腥味冇臭味。铁板蒜片牛柳粒软腍有肉汁，盐烧鸡翼烧得较为干身，盐烧鸡软骨香口惹味，大江户烧羊鞍我就冇食讲唔到乜味。虽然佢哋系电子落单，不过都有少少漏单情况，有啲嘢食到我哋就走都冇嚟，例如系蟹肉海胆汤饭等等，好彩大路少少嘅嘢食就嚟得算足。