金船長餐廳 (已結業)

难得黎到大角咀食饭，唔想再去奥海城，但又想揾间静静地嘅餐厅，路过金船长，见入面黑黑地，几有情调就入左黎。餐厅入面嘅装修有啲船上风格，上面有啲鱼网装住啲海鲜模型，主题呼应返餐厅个名。本住set一定抵啲嘅谂法，见到有dinner set 就毫不犹豫咁嗌左。海鲜蕃茄汤，味道普通，蕃茄味略嫌唔够fresh，海鲜都见到嘅。主菜嗌左个烧纽西兰羊架配薄荷烧汁，5成熟。煎得一啲都唔韧，羊肉令人难以接受嘅膻味都冇乜，加埋烧汁食，唔错！因为同友人过黎食，另外都有嗌多个主食，炸软壳蟹南瓜意大利饭。软壳蟹炸得劲香，不过南瓜味略嫌唔够，如果可以见到有南瓜蓉系度会更好。另外，餐厅必点嘅黑松露菌酱意式马斯卡普芝士夹心比萨，一上枱就已经切好一块块比你。上面布满芝士粉，加埋黑松露嘅香，系超正！除左就咁食，餐厅仲有推荐其他两种食法，都几得意，可以尝试。甜品方面，心太软朱古力布旬。摆盘好靓，都做到心太软必有嘅流心效果。金船长梳乎厘拣左姜汁味，真系食到浓浓嘅姜汁味，加上劲有空气嘅口感，系surprise嘅出色之作。宇治抹茶红豆奶昔同冻柠水，解渴。