餃掂手工餃子雲吞專門店

突然心血来潮想食煎饺，见到呢间网上好多好评，决定嚟试吓，食完真系食唔落其他连锁饺子专门店！大推香煎软心芝士饺同埋寿喜烧牛肉饺，两款煎饺都胀卜卜啖啖肉，芝士饺入边有猪肉同埋粟米，芝士非常软熟，粟米非常爽口，一软一爽，口感好丰富，就算有满满嘅芝士都唔会觉得腻，一定要嚟试吓！寿喜烧牛肉饺爆晒汁，第一啖咬落去一定要小心焫亲，牛肉都非常鲜嫩，锁住晒啲肉汁，好正！除咗煎饺，我哋仲嗌咗个蜜饯鸡翼同埋四川凉皮，鸡翼甜甜地咬落好嫩滑，佢有分大碟（5只）同埋细碟（3只），想试吓嘅可以嗌个细碟。四川凉皮有辣度可以俾你拣，我哋嗌咗个中辣都唔算好辣，但系惊辣嘅朋友可以嗌个小辣试吓先，觉得唔够辣可以再加辣椒油。最后我哋仲嗌咗个蜂蜜柠檬薏米水同埋豆浆，配饺子必饮！#nomnomdumpling #太子