Talk 2 DeCream (已結業)

食完晚饭意犹未尽，行过厚福街见到呢间雪糕店人气几旺，味道选择亦几特别，同先生一齐凑下热闹。成间铺头以少女粉红做主题，加上霓虹灯管整成嘅招牌，非常瞩目，打卡亦一流。雪糕选择唔算多，但胜在款款都有自己嘅特色，净系拣要咩味都需要啲时间。最后我拣咗店员推荐嘅玉桂苹果树，标榜纯人手自家制作，加入每日新鲜制作嘅天然苹果蓉酱，同外面嘅化学雪糕自然有分别。雪糕带有浓浓嘅牛奶味，质感香滑，面头洒上肉桂粉同插上一片苹果干，软雪糕底下系苹果蓉酱，再底层系忌廉同饼碎，好有层次感。苹果蓉酱酸酸甜甜，配搭上玉桂粉，感觉好似食紧apple crumble一样，但佢食落质感同味道更丰富。先生当然系拣佢最爱嘅朱古力，三重奏朱古力杯除咗有朱古力软雪糕，面头插住一块Oreo，仲有加入玄米碎嘅朱古力酱同朱古力饼底，朱古力迷绝对唔能够放过。朱古力雪糕本身嘅味道已经好浓郁，加上75%嘅朱古力酱令味道更香更浓，仲混入玄米粒，入口卜卜脆，沟埋饼底一齐食口感更丰富。呢度嘅雪糕组合好有新鲜感，加上成份天然同人手自家制，令人更加难以抗拒，难怪咁夜依然人气旺盛。