千海水產海鮮火鍋放題

营业中

休息中

读书嘅时候总系会有一啲人叻到超晒班。将个成绩拉到天花板咁高，搞到人地好难追。今日嚟到火锅放题界别嘅天花板，睇吓佢点解会比人优胜。 🍖门口嘅水族馆，唔系，喺鱼缸，就已经令佢赢在起跑线。又蟹，又虾，有贝类，又鲍鱼，仲要每样都有唔同品种，自己拣自己捞，又有专人帮你清洗，咁你就会知道一阵无论你叫咩汤底，佢都会充满住丰富嘅海鲜味！特别建议唔好叫咁浓味嘅汤底，咁样熬完一轮嘅海鲜汤攞嚟直接饮，就显得更加鲜甜。留意呢一个鱼缸佢会不停补货，而且系任你捞，真系好坚！ 🍖煲紧个汤嘅时候，你可以叫或者自己拎唔同嘅前菜同小食，品种多到都唔知从何写起，鹅肝同乳鸽系我嘅推介。 🍖至于打边炉配菜，品种又系多到都唔知从何写起，有啲仲系非常新奇，比如花生苗，紫色嘅羽衣甘蓝，仲有唔系人人都可以接受到嘅田鸡，等等。 🍖肉类嘅质素亦都相当高，我哋单单净系叫咗M5和牛肉同美国肩胛肉，肉质非常柔软，而且香浓。 仲有嘢饮同甜品数不胜数，品种多...你知我想讲咩啦！睇嚟其他嘅同行都要出多啲计仔，睇吓点样追翻个差距啦！