影片
更多
2024-09-23
680 浏览
竹面谱📍太子荔枝角道68号地舖星期五准时放工，我同朋友约好喺太子行街，算便食埋晚餐，误打误撞入咗一间当区好受欢迎嘅小餐馆。从店名推敲，呢间餐厅应该有面食，而且应该系港式餐点为主。睇睇餐牌，果然不出我所料，但惊喜嘅系，呢间餐厅原来系日本梦王蛋专用店，而且除咗例牌面食、水饺云吞外，佢哋仲推出和牛丼饭、双蛋百搭饭、咖哩、鲍汁花胶锅同自家鲜制凉茶等。店面虽小，但选择众多，不论爱饭面定走低carb diet嘅客人，都总会揾到啱心水嘅餐点。今次因落雨而不经意发现嘅竹面谱将会系我哋每次嚟太子嘅首选餐厅。肤浅哋先讲价钱，餐厅逆市中仍坚持以平到笑嘅价钱为太子街坊、当区学生同打工仔提供高质餐点，呢点已经好佛心，好唔话得。有幸同老板娘倾偈，从言谈间得知佢哋将唔同类别嘅食客饮食需要作为考量，再针对各类客人设计餐点，令所有人都可以自由拣选适合自己嘅嘢食，呢点更值得令人佩服。简单而言，老板娘考虑到学生们处于发育期，所以主动向佢哋提供加饭唔加钱服务，令学生哥可以用平价食饱饱；又喺11:00至5:30呢啲午市茶市黄金时间，推出葱油孖蛋百搭饭，餐肉、猪扒、鸡扒、鸡翼主食四选一，连孖蛋都有得选择烹调方式，都系两张廿蚊有找
📍太子荔枝角道68号地舖
星期五准时放工，我同朋友约好喺太子行街，算便食埋晚餐，误打误撞入咗一间当区好受欢迎嘅小餐馆。从店名推敲，呢间餐厅应该有面食，而且应该系港式餐点为主。睇睇餐牌，果然不出我所料，但惊喜嘅系，呢间餐厅原来系日本梦王蛋专用店，而且除咗例牌面食、水饺云吞外，佢哋仲推出和牛丼饭、双蛋百搭饭、咖哩、鲍汁花胶锅同自家鲜制凉茶等。店面虽小，但选择众多，不论爱饭面定走低carb diet嘅客人，都总会揾到啱心水嘅餐点。
今次因落雨而不经意发现嘅竹面谱将会系我哋每次嚟太子嘅首选餐厅。肤浅哋先讲价钱，餐厅逆市中仍坚持以平到笑嘅价钱为太子街坊、当区学生同打工仔提供高质餐点，呢点已经好佛心，好唔话得。
有幸同老板娘倾偈，从言谈间得知佢哋将唔同类别嘅食客饮食需要作为考量，再针对各类客人设计餐点，令所有人都可以自由拣选适合自己嘅嘢食，呢点更值得令人佩服。简单而言，老板娘考虑到学生们处于发育期，所以主动向佢哋提供加饭唔加钱服务，令学生哥可以用平价食饱饱；又喺11:00至5:30呢啲午市茶市黄金时间，推出葱油孖蛋百搭饭，餐肉、猪扒、鸡扒、鸡翼主食四选一，连孖蛋都有得选择烹调方式，都系两张廿蚊有找，造福附近嘅街坊街里！可能有一班钟意做gym嘅客仔经常帮衬，老板又为佢哋专门打造low-carb选项—低卡蒟蒻面、慢煮鸡胸等，令一众gym友唔洗净系食白灼嘢咁
最后，就系非常人性化嘅点餐设定，相信大家都可能遇过想追加小食、配菜，但优惠价钱只能加配一次，再追加就必须以正价追加嘅情况。深知食客心意嘅竹面谱，全日供应「无上限追加」选项，以超抵价钱共提供20款小食、饮品、配菜，如轻量版炸物、郊外油菜、香茅猪扒、香煎鸡扒⋯⋯只要想食，就可以无限加加加，啱晒样样都想试下嘅朋友！
[价钱 Price]
💰$68
梦王和牛丼🐄
全场最多人嗌嘅一定系呢碗高打卡度嘅梦王和牛丼，朋友坐落就被佢吸引住。多数人都会拣配生梦王蛋方便捞饭，但朋友唔太喜欢全生鸡蛋嘅口感，所以拣咗配流心蛋。小小一碗嘅和牛丼非常抢眼球，和牛肉色嫩红，充满油份，睇住橙红色嘅流心梦王蛋黄慢慢溢出，加入少量酱油后拌匀蛋黄同珍珠米，每一口白饭都食到鹿儿岛A5和牛嘅余香！和牛接近入口即化，蛋黄包覆每粒米𩠌，貌似简单嘅配搭却打造最惊人嘅味道，牛魔王们一定一定要嚟食返次！
[价钱 Price]
💰$34
驰名韮菜饺 🥟
身为饺子控又点可以唔试下佢哋嘅韮菜饺？因为想食得健康啲，所以拣咗汤饺，有quota嘅朋友可以试下炸韮菜饺。虽然唔系我食过最好食嘅饺子，但佢的确可以用皮薄馅靓嚟形容。
将翠绿嘅韮菜混入半肥瘦猪肉，包喺薄身但细滑嘅饺子皮内，馅料调味适中，个人认为就咁食已经有好香嘅猪肉同韮菜香气，加上中长嘅拖尾，入口非常顺滑。最抵赞系无添加味精嘅汤底，清澈无油，饮多两啖都唔怕大负担！
[价钱 Price]
💰$48
低卡蒟蒻面 🍜
Low-carb选项有冷食/汤食蒟蒻面，两款都有跟配一只梦王蛋，抵食不二之选！我哋拣嘅冷食配有吞拿鱼、车厘茄、粟米粒同青瓜丝，打完卡后拌入芝麻酱，就可以享受一碗冰凉低卡Q弹爽口嘅蒟蒻面！
[价钱 Price]
💰$42
炸蚬蚧鲮鱼球拼炸墨鱼饼 🧆
净食单拼双拼统一$42，我哋拣咗招牌蚬蚧鲮鱼球拼炸墨鱼饼。鲮鱼球偏长身，有少少似榄榄形状，每粒大细相若，即叫即炸够晒热辣辣！咬一啖便知龙与凤，虽然鲮鱼球大大粒，但一啲都无偷功减料，食落口感皮脆肉弹，无加入大量粉去定形，反而以鲮鱼挞成胶制成，弹牙嘅口感、新鲜嘅鱼香味无得呃，一定系真材实料、自家制先有嘅质素。鲮鱼球本身味道唔算重口味，非常建议大家点少少蚬蚧汁食，吊出鲮鱼球嘅咸鲜！
炸墨鱼饼混入少量粟米，同样唔会食到成口粉，厚薄适宜，炸得香口，点泰式甜辣酱一齐食更加惹味！
[价钱 Price]
💰$18
烤猪颈肉 🐖
老板娘极力推荐我哋追加烤猪颈肉，解释因为经过多番失败后，先研究到以先蒸后烤技术烹调猪颈肉。而且厚薄必须拿捏得好，先可以令猪颈肉既腍身，但又保留到爽弹嘅口感，烤过后仲多咗份焦脆，点埋微酸嘅酱汁更能中和油腻，留下油香，推荐大家一试！
[价钱 Price]
💰$18
瑶柱上汤浸萝卜 🥕
萝卜清甜无渣，汤底简单以姜、葱、瑶柱煮成，纯粹嘅味道、暖胃嘅感觉，令我觉得呢道小食胜过居酒屋几十蚊两片嘅高汤萝卜多多声。
[价钱 Price]
💰$10
冻清心火 🌿
以麦冬、白芍、灯芯花、淡竹叶同羚羊丝煲成嘅清心火凉茶，有清热气、热气、除口气、去暗疮、平肝火、肺燥咳同安眠作用，主打新鲜自家制，而且有微糖同无糖供以选择，加配价都只系$10一枝，绝物超所值！
除清心火外，仲有去湿茶同金银菊花薏米两款选择，全部颜色都偏浅，但饮落好够味，真材实料，冻饮份外冰凉降火！
[价钱 Price]
💰$28
炸鲜奶卷 🫔
最后追加轻量版炸鲜奶卷甜品作结，出乎意料之外，朋友最爱居然系好多地方都有得食嘅炸鲜奶卷。原因系呢度唔会炸得太干身，又唔会滴晒油，真系食到奶嘅香醇，难怪老板娘咁推介！
张贴
