越南米紙 (已結業)

我帮衬咗呢间餐厅几年，一直当佢系饭堂。今朝谂住去食个brunch，见到个餐牌转咗，心知不妙。以前早餐menu好丰富(可参考其他食评)，而家剩返4款，仲要冇side dish (多士、煎蛋等)。以前D食物都几有越南风味，而家主要系车仔面，明显个厨换咗，冇哂越菜，何谓"越南米纸"????以前服务都几好，侍应同D客有讲有笑，而家个经理转咗，连拎杯水都要客人自己去水吧拎。虽然冇收加一服务费，但系拎杯水咁简单，都唔帮个客。d客人喺间餐厅四围行，空间又唔系大，只会造成混乱。以前有侍应帮手点餐，而家要客人自己喺餐牌上面划。我问个经理，早餐餐饮包唔包豆浆，一开头话包，过一阵之后就行过嚟话唔包。点做经理，俾咗错误期望俾客人，对menu唔熟悉，好唔掂。以前餐具都系可再用嘅，而家全部只派即弃餐具(堂食一样)，包括筷子、匙羮、杯，连碗都系塑胶即弃。我明白洗碗工好难请，但系当政府同大集团都推广走塑嘅时候，呢间餐厅竟然反其道而行。完全冇社会责任、环保意识，有学识同教养嘅消费者都应该以自己嘅行动作出抗议，唔好光顾呢类不理会可持续发展嘅餐厅。