金御海鮮酒家 (恆豐中心)

营业中

休息中

个多星期前去咗呢度同朋友食晚饭，三个人叫咗一个龙趸套餐，好抵食，条鱼唔太大，调味有水准，太大嘅鱼我唔钟意，因为多数肉质都比较「鞋」，但系呢度嘅蒸鱼套餐，size啱啱好，条鱼唔会太细冇肉食，又唔会太大太老，蒸得啱啱熟，时间掌握得好，然后仲可以加配小菜，我哋拣咗鲍鱼鸡煲，鲍鱼有四只，我哋三个人够分，仲可以有人食多只，然后啲鸡份量都OK，唔算太少，再加一个菜同埋白饭，整体份量系合理嘅，味道亦都保持到金御以往嘅水准，当然酒楼菜会有啲油腻，但系唔算太过分，材料亦都合理，价格唔算贵，系一个好啱普通食饭场合嘅价位，当然如果要庆祝一啲特别日子，呢度嘅水准就未必好够好，环境亦系普通一般市区酒楼酒楼咁上下，但系招呼好好，喺楼下问我几多位，话有另外两位到咗，已经识得带我去朋友𠮶张枱，好醒目，然后我朋友漏低咗啲嘢喺酒楼，返转头都好容易揾返，因为帮我哋keep好咗。呢度值得再嚟，价钱合理，招呼好，食物水准都ok，值得推介。