智景車仔麵 (已結業)

炎炎夏日，坐低就叫咗杯红豆冰饮。由于呢间餐厅嘅红豆冰用咗铁杯装，以致见唔到红豆冰红白分明嘅经典招牌卖相，少咗一个打片位，亦见唔到红豆同奶嘅比例。但就系因为呢种薄铁杯冇隔温效果，杯红豆冰一上台就会有好多倒汗水，只手同只铁杯接触𠮶刻，可以完全毫无保留地Feel到杯红豆冰有几冰冻，饮落特别消暑，感觉有别于饮一般用胶杯装嘅红豆冰。装红豆冰嘅银色杯身铁杯配上同样系银色嘅铁羹组 合，喺随意中畀人一种不随便嘅感觉，而且好环保噉唔系用即弃胶羹or搅棍。杯红豆冰冰嘅比例非常适中，饮到底都仲见到少少冰，由落台到埋单𠮶刻，杯红豆冰依然系好冻嘅。由于杯红豆冰本身就好浓郁，唔使惊啲冰溶咗，令杯红豆冰太淡嘅情况出现。杯红豆冰好重奶味，红豆亦煮得够溶，整体嚟讲系偏甜嘅，关注血糖人士要注意，不过好味。唯独饮太多会有啲漏，不过好彩佢分量啱啱好。呢间餐厅走塑成功率好高㗎！我今次走饮管又成功咗，仲欢迎自携食物盒买嘢食。不过佢会照收加一蚊外卖费。