元祖和風食堂虎藏 (已結業)

呢日一行二人嚟到启田道嘅元祖虎藏和风食堂食晏。我哋叫咗两个定食套餐，猪肉泡菜饭拉面定食 ($54)、虎藏牛肉饭拉面定食 ($54) 及冻柠茶($7)。两个定食套餐嘅前菜、拉面系一样嘅，唯一唔同系饭上面可配搭嘅𩠌。先讲讲拉面，有三款汤底可以拣，和风酱油、猪骨及味噌。我哋今次都拣咗猪骨汤底，汤底饮落似加咗少少味精提鲜，拉面入面嘅叉烧都算腍身，但食落味道唔系好新鲜，全碗面较好食嘅系个竹笋，不过有渣。再嚟讲讲两个饭，先讲饭底，饭粒望落似日本珍珠米，但好奇怪食落松松散散，完全无绵腻嘅感觉，而且一啲米香都无，失望。牛肉煮得太老嚡口。泡菜猪肉，猪肉少到几乎揾唔到，而且啲泡菜非常腍，腍pat pat, 口感好奇怪。杯冻柠茶, 跟餐加$7，真心觉得有啲贵，而且茶味同柠檬味都太淡，亦都比较细杯。最后讲讲服务，可能因为新开张嘅关系，服务有点混乱，我哋张枱同隔离张枱，都有上错餐嘅情况出现。虽然呢度D套餐定价唔贵，不过好有将货就价嘅感觉，无论食材、服务都有大大改善嘅空间。