沛公甜品 (已結業)

喺耀华街食完晚饭就过隔离食甜品，有间星级嘅甜品门口排哂长龙，真系唔知要等几耐。退而求其次就拣间无人排队立即入座嘅沛公。舖面嘅装修都几简陋，甫坐低已经觉得间舖好噪，因为旁边几枱都系一大班操普通话嘅年轻人，似乎呢度好受内地人欢迎。香芋红豆千层班戟$28，个卖相麻麻地，啲cream跌哂出嚟。个班戟有大量嘅cream，少量红豆同芋头肉，香芋味唔系好突出，味道一般。椰汁芒果黑糯米，味道正常，黑糯米同芒果嘅份量都算多，芒果几甜。三甲$68，包括有杨枝金露、西瓜马露天使、蜜瓜紫霞仙子。改个咁fancy嘅名，估唔到出嚟系咁普通，卖相唔吸引，食落冇特别，每碗都装到滴哂喺个碗边嚟上枱⋯呢个价钱真系接受唔到咁嘅质素。最沉实嘅蕃薯糖水竟然味道最好，睇色水就知足料煲咗好耐，呷一口味道够姜，唔太甜，仲有大量蕃薯，但因为蕃薯好滞，太饱食唔落，早知叫佢俾多糖水少蕃薯我啦自从当年风靡一时嘅千层班戟之后，似乎已经后劲不继，再冇推出其他吸引嘅新产品，俾好多新崛起嘅甜品店迎头赶上，希望迟啲沛公会有改善啦。