桔梗 (已結業)

朋友话之前黎过下午茶感觉唔错，特登要试埋个晚饭，六点几去到发觉都几多人，好彩都仲入到，但最好就系book定位～食咗个好丰富嘅二人套餐，其实以我地嘅食量，绝对够三个人食！炙烧吞拿鱼有芥末汁同蛋黄酱，入口传来阵阵炙烧香气，真系越食越想食！炸鸡肉够嫩又够Juicy，外层粉浆唔会太厚，脆卜卜热辣辣，点台式五味酱，好味！京葱柠檬味猪腩层层分明，一层肥一层瘦，烧得刚好，咬落有油脂香但唔会太过肥腻，一片一口咁样食，特别香口惹味！极力推介呢个明太子酱炒鲜鱿鱼，用上土鱿伴炒香嘅明太子酱，食落有咬口之余有一种粉嫩嘅感觉，鱿鱼香入口后慢慢渗透出嚟，配搭够晒特别，系我同朋友都举脚赞成下次黎要encore的！套餐仲包两碗茶渍饭，一碗有大量明太子，另一碗有香港人至爱嘅三文鱼，泡饭粒粒饱满吸满汤汁，配上吸睛嘅流心蛋，超好味道！最后有原个柠檬芝士挞，加咗而家好Hit嘅蔴糬喺中层，带嚟多一种口感之余，仲可以中和柠檬挞嘅酸度，系一个唔错嘅甜品。