泰地道 (文苑樓) (已結業)

因为要去圆方睇戏，所以系附近揾食，之前食过一次都觉得野食唔错，有一贯九龙城泰菜水准，今次无谂咁多再食一转。不过可惜今次预错份量，两个人食嘅嘢同4个人食差好远，系度提提大家不能叫太多，费事食唔晒浪费……加上呢间嘢都几落力sell食烧海鲜，大家叫菜时可以留意下。🥢🍞黎到必食一定系佢个蒜蓉包，用厚多士切成条状，面头铺满蒜蓉粒，烧完又入味又脆卜卜，好有心机整（我见啲店员都有系度食😂）。🥢试咗两只烧扇贝，又系铺满蒜蓉，盖过晒粒扇贝，可彩扇贝都厚肉，唔会太细只，中意食蒜蓉嘅人就有福了！🥢冬荫功汤嗌咗个细嘅，材料有大虾同秀珍菇，酸酸尾尾带有少少辣，食完个汤好开胃。🥢食到一半已经好满足，口痕再嗌咗个马拉盏炒椰菜苗同鸡肉泰式干炒河，份量好多，两个人食厌有啲多，所以话一班人食泰菜会开心好多！唔小心点错咗干炒河，下次会食返湿炒。😅当晚晚市客人唔多，老板娘都有礼貌推介餐单比我哋，最尾我地赶时间睇戏，连免费嘅饭后甜品都无食到，好似系糯米糍，个人认为厨房水准唔差，下次会再黎食！