馬拉公公

营业中

休息中

前几日阿囝放学后，同佢行去Gogomall food court揾食。果度啲位唔系好多， 但平日lunch time 都唔算太多人， 好快都揾到张台。咁啱张台系马拉公公附近， 我就睇下佢有冇野啱阿囝食。阿囝睇完个餐牌， 话想食吉列猪扒， 但见佢啲吉猪都系咖喱， 唔知小朋友食唔食到， 我就问老板娘意见。老板娘话如果小朋友食， 建议食白咖喱， 冇咁辣，甜甜地，易入口。所以我哋就听老板娘建议叫左白咖喱吉猪饭，冻美绿，然后再叫多个白咖喱无骨海南鸡掺掺，冻柠水俾自己。等左十几分钟便有得拎，个卖相都好得，老板娘仲好贴心的话只淋左少少咖喱汁系上面， 唔够再自己加。阿囝食左一啖就话好味，话唔辣，吉猪一旧驳一旧咁食，好快食晒啲猪扒。啲饭好多， 食唔晒， 下次要叫少饭先得。我果个无骨海南鸡掺掺，真系做到无骨(除左旧鸡翼)，D鸡好嫩滑，白咖喱汤底好入味，唔辣。掺掺索晒个汤底啲汁， 好正!我好快就K.O. 左佢！之后我search openrice, 原来马拉公公系屯门好出名，有好多好评，下次再来试其他野。