碗碗香 (已結業)

一直都觉得大陆出品嘅面好好食，估唔到系香港都可以食到。呢间店舖面积唔大，我哋拣咗个角落坐低。今日食嘅系贵州粉，其实冇听过贵州呢个地方，真系第一次试。男友人叫咗个红油牛肉粉，小辣，食落有啲麻，原来仲有只bb辣，店家话系任何人都食到嘅辣，汤底加左花椒，所以会有麻香，用上等大红袍精细磨制成花椒粉，有散寒，健脾同埋促进食欲嘅功效，估唔到食一碗普通嘅牛肉粉可以有咁健康嘅效果！我就试咗红烧牛肉粉，呢个系唔辣嘅，边个汤系用上等嘅猪骨加鲜鸡做汤底，再加埋新鲜嘅牛骨，就系三骨原汤啦，呢个汤绝对冇味精，味道好浓郁，我都几乎饮晒个汤底，饮完觉得好生津！两碗牛肉粉都有泡菜做配料，其实即系酸菜，味道好清爽又酸脆多汁 ，好开胃！至于啲牛肉系上等牛展，筋同肉嘅比例都好均称，咬落一啲都唔硬，好好味！而碗面嘅精髓贵州粉系无添加，冇色素又冇味精，要煮几个钟，口感爽滑，唔易断，又唔会太淋，夹起上黎好有弹性！最后每人叫左杯苦丁茶，店家话系解辣良品，饮完回甘嘅感觉久久不散，功效可以降血脂，降血压同降血糖，非常健康。