老地方 (已結業)

都有一段時間無黎幫襯喇，始終無變最好食係炒菜同火鍋，其他真係有待改善呀 ﹗清炒生菜，今晚唔知咩事，最初叫菜芯賣晒，跟住叫白菜仔又賣晒，最後唯有叫生菜啦。啲菜特喇好賣，咪因為真係炒得唔錯，每次必叫炒菜食。正常係會用炸蒜炒既，但想清清地食原味，所以咪清炒只落鹽囉。碟菜熱騰騰上枱，出晒煙，見到又聞到好有鑊氣，生菜新鮮爽口又多汁，好味道。芥辣炸雞翼，從來未試過，所以咪好奇叫黎試試囉。同我想像中差天共地呀 ﹗只不過係炸滷水雞翼上面嘖啲沙律醬同青芥辣乍，吓？﹗好失望，只係食到甜味同炸雞翼味道，雞翼乾硬無肉汁，差 ﹗肥牛烏冬火鍋配冬陰功湯，都係咖喱湯底辣好多。有豆腐、鮮冬菇、金菇、蘿蔔、豆腐卜同大量生菜作配菜，另加最平宜嗰隻肥牛 4 片囉。其實我覺得幾健康架，多菜少肉喎 ﹗普通街買即食烏冬，因為全部野一齊煮，所以緊記要食烏冬先，平價烏冬好易熔架，滾起就要食，唔係轉頭就腍到變粉又黐低。以五十蚊價錢黎講，真係超值。