鮮入圍煮 (已搬遷) 新店位置

一早聽聞呢間好出名的邊爐餐廳，之前無機會食，今日終於試到。一入到餐廳入面，好似街市嘅，有海鮮賣，俾你自己挑選，用作打邊爐的材料。另外啲枱凳擺設就好似大排檔。見到墻上有一個貼紙寫住佢喺上海開咗分店。一坐低，侍應推介我地叫花膠雞湯，話9成人都係叫呢個煲，理所當然就叫咗呢一個湯底。一上湯個侍應會幫手將半隻雞分到細細份俾我地食，見到湯底材料非常豐富有半隻雞加花膠，超足料，我和友人先飲左碗雞湯再放材料入去打邊爐。手切安格斯牛肉，牛肉好薄，好新鮮，脂肪分佈均勻。脆肉鯇骨腩，打邊爐一定要有，好脆好爽口。炸響鈴非常脆，用嚟打邊爐一流。元粒帶子水餃，咬開來會見到有粒帶子係入面，好爽口，啲肉好新鮮。仲有娃娃菜，娃娃菜好新鮮，放係湯度煮左好耐，好好味。仲叫左2枝啤酒$20/枝。