好味皇茶餐廳

营业中

休息中

今日本来同班朋友约左去呢间茶餐厅隔离既添好运食野,点知成班朋友冇一个BOOK枱, 更加估唔到呢间野真系咁犀利六点几去到,排哂长龙,都唔知要等到几时。最后等到七点几都未有位,就去左呢间好味皇茶餐厅医肚。 虽然话系茶餐厅,但有得食既野都几多,大排档小炒同海鲜都有,成班朋友都好肚饿,一行八个人,叫左10碟野黎食, 有碟叫做香芒鲜虾球,一碟八粒,每人一粒岩岩好. 外貌同一酒楼既炸虾球冇乜分别,但系咬到入面,有大大粒芒果肉,酸酸甜甜,我平时冇乜食开炸野,因为觉得好热气,都觉得呢个虾球好食,可能因为有粒芒果中和下,成个感觉冇咁干。另外有一碟,咸鱼煎肉饼, 材料应该同普通蒸肉饼冇乜分别,但系煎出黎既效果好好,好香口又野味,送饭一流,系出面都系过差唔多既煎肉饼,但一定冇呢个咁野味。 其余D野食都算系不过不失,但系好似口味偏重,因为今次大家太肚饿,好快就食完,冇影到相,但系下次应该会再黎,因为有朋友话想试下个黄金墨鱼饼,最重要既系 埋单每人都系百几蚊,当中仲有赖尿虾,炒蟹,炒蚬等海鲜,可以话系十分抵食。