純麵舍

营业中

休息中

鲗鱼涌呢个地方平时lunch time真系人山人海，但系一到放工之后其实就冇乜人。有一日放工行过想食啲嘢先返屋企，就发现呢一间新开既铺头，入面虽然唔多座位，但系胜在好有日本小店嘅风味。坐喺个拉面师傅面前佢即席整拉面俾你食，师傅仲好好教我点样食沾面先至系品尝到佢哋拉面嘅特色，虽然睇落去份量好似唔系好多但系其实一个女仔食系超 级 饱！而且佢个汤同我喺出面食嘅沾面系有分别，出面嘅汤底系会比较浓稠，但系呢间小店嘅汤底就比较清澈，但系又唔会冇咗平时沾面𠮶种汤嘅味道，所以话其实食得出佢哋系好有诚意去整个汤底，用咗好多材料去熬制而成，值得一试。每个人嘅口味都会唔同，有赞亦都会有弹，唔好嘅地方系佢个面嘅质感好似煮得太过淋，所以变相左食嘅时候有啲黐埋一旧，同埋个汤底虽然系好清但系其实都有啲油浮咗喺面，所以都唔敢饮晒佢个汤底。虽然我叫呢个系辣汤底，面头有可能系辣油，但系其实明显地分得出，辣油定系个汤底本身油嘅感觉。