楚撚記大排檔 (馬頭圍道) (已搬遷) 新店位置

之前见到呢间餐厅冠名赞助一个演唱会，所以就心思思去试吓佢个大排档餐厅，舖头喺土瓜湾马头围道，都几方便揾嘅，估唔到佢貌似大排档，其实都系一间干净企理嘅餐厅。我哋嗌左个招牌菜黑松露莲藕墨鱼饼，墨鱼饼煎得非常香脆但唔油腻，墨鱼肉爽口弹牙，配埋满满嘅黑松露，真系一个好好嘅小食。另外就嗌咗两个小菜，小炒王方面，镬气十分足，材料非常之多，叉烧虾干鱿鱼腰果，一啖食落去有唔同嘅口感同层次。另外薯仔牛柳粒亦都系我大排档必点嘅菜，薯仔粒恰到好处，切得细细粒一啖一口，而且外皮香脆，沾满左满满嘅蜜糖，而牛柳粒更加系淡淡牛香，配埋白饭真系送饭一流。最后仲有糖水送埋，今日系有得拣番薯糖水或者系清补凉，食完饮番碗清补凉清清喉咙，真系一个好贴心嘅服务。