羅麥記 (V City) (已結業)

今时今日怀旧装修同食物已经唔算咩卖点，同类食肆已经有唔少。一定要食物质素，选择同价钱都合理，先至有吸引力。 罗麦记装修不俗，垫枱张康乐棋纸真系后生啲都可能唔知系乜。 衞生同环境就冇“怀旧”，尚算干净唔太迫。 食物款式有特色得嚟都几好食。砖头焗猪扒饭，猪扒松软，茄汁味道不俗，个面包先系灵魂，索晒汁，食落香软，好食过啲饭！ 罗麦汁鸡翼捞面，个汁冇正宗瑞士汁咁香浓，不过用嚟捞面味道就啱啱好，太浓嘅话就会好咸。虽然个捞面食落略嫌黏口。美禄甜面包，其实只不过系奶酱多加美禄粉，略为调节卖相就好似甜品仲可以卖贵啲，真“聪明”。 红豆冰奶茶，整体上一般茶记货色，不过有两粒内有红豆嘅冰就几得意，虽然其实整体味道同口感似乎冇因为呢两粒冰改变… 喺今时今日当唔少食肆嘅食物闷到爆或者得个样嘅时候，罗麦记总算取得个不俗嘅平衡。希望可以保持水准吧!