Cocina 3 Tapas Restaurant & Bar (已結業)

喺疫情期间一切运动地方都关闭，只有奥海城有开室内高尔夫练习场，所以呢段时间经常喺奥海城出没，今日练完波有啲肚饿所以喺度食埋饭先至返屋企。喺奥海城三期商场地下，大部份餐厅都有室内同埋室外位置，坐起上嚟零舍舒服及安心，见到呢间主打西班牙菜式，装修有品味，现决定试吓。晚餐散叫为主，基本上无套餐选择，但款式都算好多，小食都有10款，酒水选择亦10分多元化。龙虾汁大虾海鲜阔条面，一放上枱龙虾汁香气即刻飘出来，香浓吸引，叫得大虾只虾嘅size真系都几大，仲有青口同鱿鱼等海鲜，味道有少少酸。法式焗田螺水准唔错，底下有好多薯蓉，分量足够当为主食。德国蜜糖烧猪手，个份量大得有少少吓人，我老公只手掌都超过八吋，比起上嚟都唔够只猪手大，个猪手皮炸得好香脆，食落去卜卜声，猪手又唔会太肥，皮连肉一齐食都唔会觉肥腻。有咁多美食加埋一杯啤酒简直系绝配。