星級扒房 (已結業)

父亲节喺旺角揾食，一系多人一系加价。唔觉意见到呢间扒房，$138一客西冷仲有半自助头盘任食，即刻拍板光顾。餐厅面积唔大，但环境唔错，都算舒适清静。半自助头盘主要有沙律吧（菠萝、哈蜜瓜、西瓜、三角豆、腰豆、粟米、蔬菜）、螺丝粉沙律、泰式凤爪、焗酿蛋、蒜蓉包、薯条及薯角无限添食。摆食物嘅位置虽然细，但厨师经常refill，绝对冇欺场。啲沙律料好新鲜，凤爪辣味适中，蒜蓉包酥脆，酿蛋好味。唯一可惜系我错过咗一款热批，畀人攞晒冇refill, 试唔到。餐汤系要同侍应点嘅。番茄汤或周打鱼任㨂，我㨂咗前者，味道唔错。饮完汤食完沙律同小食其实已半饱，想试埋周打鱼汤都无能为力。主菜西冷扒，厚切一大块，比想像中大件。讲真，自己间中去百佳买牛扒，都好知价。$138一个餐我唔会预佢畀呢个分量我，所以上枱嘅一刻已经有惊喜。但更大惊喜系个扒真系grill而唔系煎，真系做到我五成熟嘅要求，充满烧烤香味同肉味，仲有软滑嘅薯蓉相伴，真系好满足！甜品系咖啡布甸，味道极佳。稍为失色嘅系咖啡，味道稍涩。今时今日，$160都唔使食到质素唔错嘅扒餐，仲有咁多嘢任食，性价比真系超值，睇得出老板好有heart，希望佢生意好。