你妳 (運通洋樓) (已結業)

好食是良知，信念一致都要食物入得口先得。见到呢间好评如潮，同芋泥控朋友一试，入座同落单时一位店员嘅态度唔太友善，好似畀人激嬲左咁，唔紧要啦香港人压力大，食物正常就得啦，点知食物质素都强差人意，好彩我只系食个下午茶。私下同朋友分享先发现有其他苦主，去唔去自己衡量啦。 🍽你妳吐司套餐：芋见紫薯吐司配梅甘地瓜条 ($68⁣)吐司有芋见紫薯、肉松芋泥同紫薯泥肉松三款，配梅甘地瓜条或精选炸物篮。先唔讲好唔好食，一撕开吐司嘅包装纸就见到原只小强尸体已经吓亲🙃店员当然换过份新嘅黎，吐司有烘过，但硬夹干，芋泥同紫薯蓉份量几多，都算幼滑，甜度唔高，但得紫薯有啲味，而且个馅冻冰冰，同我预想有出入。地瓜条炸到外皮脆身，甘梅粉比平时食开嘅酸，怪怪地。🍽甜品芋圆套餐：仙草3号配精选炸物篮 ($59)仙草3号有三色芋圆、包馅芋圆、珍珠同水晶，包馅芋圆厚实粉感重，三色芋圆食唔出各自嘅味，糖水甜度爆登，布丁就系儿时小食部𠮶啲。芋圆套餐同样配一款小食，叫左炸物篮，有虾卷鱼饼等，系全餐唯一摆得落口嘅食物。套餐包冬瓜茶或蜂蜜绿茶，问店员绿茶可否走糖，佢叫我加钱转茉莉绿茶，换来有色冻水一杯。