越瀧棧

营业中

休息中

今日响粉岭礼贤会中学附近做嘢，经过门面满有越南风嘅呢间食店，越南菜系我喜爱嘅菜款之一，睇睇门口餐牌，价位合理，晚餐就响呢度解决啦。店内环境明亮清雅，挂画、装饰都好有特色，可以见到店家嘅心思。选了二人套餐 (B)，再加一个小食。软壳蟹纸米卷软壳蟹炸得香脆热辣辣，纸米卷包住软壳蟹、甘笋丝、檬粉、青瓜丝、萝卜丝、生菜、九层塔，米纸软韧适中，就咁食清香新鲜又爽口，点埋鱼露更添风味，正。二人餐有小食作前菜，香茅鸡翼、手打虾饼。香茅鸡翼皮脆肉嫩香味诱人，虾饼新鲜热辣辣，鲜味浓郁，做过手打虾胶嘅人就会食得出，口感有手打嘅弹性，真材实料。香茅猪颈肉河粉河粉拎嚟时已经闻到好香，上面好多块猪颈肉，下面有河粉、芽菜、洋葱、萝卜。猪颈肉质爽口惹味唔肥腻，河粉够滑，萝卜腍甜，个汤都好味。香茅猪扒捞檬檬粉上面铺满红萝卜丝、青瓜丝、花生粒、炸蒜、葱油同埋香茅猪扒。猪扒腌得入味，口感软腍最钟意食冻檬，檬粉够干爽有弹感，加埋酸辣鱼露酸捞配料，好食又醒胃！马拉盏炒芥兰香喷喷好有镬气，芥兰新鲜爽脆无渣，马拉盏辣辣哋加咗虾皮，又香又惹味！套餐包埋甜品，椰汁冰凉粉，椰汁好香，好味。成个套餐份量几多，我哋食唔晒，好抵食！