Circle M (已結業)

今日工作关系约咗人倾嘢，原先谂住去𠮶几间楼上 cafe 都因为疫情而唔做堂食，结果临急临忙揾到 Circle M，一试之下，估唔到好有惊喜㖞😃。叫咗 lunch set 嘅招牌卡邦尼意大利粉，餐汤系南瓜汤，两样嘢嘅水准都非常唔错：个汤虽然冇乜南瓜茸，但就好鲜甜，一向唔钟意南瓜嘅我都觉得几正；卡邦尼意粉叫得做招牌，果然有啲料到，酱汁够杰身，芝士同蛋黄味够浓郁，真心好食👍。除咗食物质素唔错之外，呢度嘅摆设同装饰都好吸睛，例如七彩缤纷嘅马赛克玻璃座地灯，墙身挂住嘅鱼缸同怀旧黑胶唱片等等，都非常靓非常有心思，坐喺度饮杯嘢，倾下偈，或者睇阵书，其实相当舒服。临走前，同店员哥哥倾咗阵，我话今日坐咗三个几钟，计埋我成间店都剩系得三名顾客，真心戥佢哋惊🥺，佢话疫情关系，都冇办法，好彩平日生意都算 ok，仲话迟啲出面平台整埋 BBQ，希望到时会多啲生意。好，之后一定会再嚟。