鐵板燒紗舞縭 (已結業)

真系求其到再冇得求其，行完aeon见到有间铁板烧，晚饭时间仲要有位咪去试吓啰，坐底阿姐推介有个海陆空餐就试佢，上菜快到你唔信，一叫完就上咗个炒菜，其实我望住佢几个order一齐做，做多咗一个等人点餐，但系都唔洗咁快，到前菜同汤都食埋都仲要等成10分钟先有头盘上，个炒菜都冻哂，头盘有阿根廷红虾同鹅肝，真心要讲句阿根廷红虾除咗做刺，攞去熟食真系难食到一个点又霉又肉酸，个肝食落粉粉地，应该唔系鸭黎，跟住再黎个洋葱鸡扒，一咬落去真系大开眼界，原来呢个世界真系天外有天 人外有人，记得之前睇地狱厨神，有个参赛者用鸡胸做主菜，主题系将件鸡胸煮到好似鸡脾咁滑，呢度竟然做到呢个效果，将鸡脾煮到鸡胸咁鞋，当我觉得呢个世界灰到冇得救既时候，师傅递个牛扒埋黎，可能佢地就系要将你心态搞到谷底既时候，先俾的正常野你食，牛肉眼还可以不过多筋多膏，呢个时候已经冇乜要求食饱就算。