千房 (已結業)

话说见到DIY大阪烧，本身好兴奋谂住去玩下试下自己整，唔估到一入黎就受悔气，入座无5分钟个经理已经催咗几次落单未，心谂黎食餐饭姐洗唔洗催命咁？之后无奈下落咗个diy大阪烧先，再继续睇下menu，个经理喺落单果阵已经用好不屑嘅语气话一个大阪烧三个人唔够食，我地都解释咗系落住先，仲睇紧个menu，毕竟系第一次黎，都唔知咩好食，之后个经理仲一直强调三个人要叫三样嘢，唔系佢开个炉俾我地diy会蚀。我地会落，但唔系一坐低即刻就落单好无？全个场咁大得两台客又唔系忙？又唔见有客喺出边等紧位？洗乜咁样催？个经理仲威胁我地如果无叫三样嘢就格硬帮我地order几杯嘢饮，落完个diy大阪烧之后仲听到个经理好大声咁嘲笑我地话三个女仔叫得一个大阪烧，真系第一次见咁无理嘅人都做到经理，真心为呢间舖嘅营业深感担忧呵呵，最后我地都系无心情食呢餐饭，叫多咗个lunch set就算。呢间餐厅应该算系全香港最差服务态度嘅餐厅？第一次食嘢食到成肚气，从来唔写食评嘅我第一次写食评，真系令我印象深刻嘅餐厅，永远嘅blacklist，不会再帮衬。（其他侍应服务态度好好，系个女人经理连做人嘅基本质素都无）