許記車仔麵

营业中

休息中

牛池湾墟主要有3间嗱渣面，1间之前介绍过只得番串烧，另一间就系呢间许记。舖面就系五张折枱折凳，例牌都系先喺门口执咩𩠌、面底，俾完现金就自己捧面入去食。冇咩花肖装修、冇咩好特色标榜自家制另类车仔𩠌，卖嘅系纯粹车仔面。胜在价钱真系相宜，四十蚊有找食到碗三𩠌车仔面，份量够女人小童食。菜仲几新鲜仲要俾好大撮（见有通菜张图）。牛腩系腩碎，个人口味钟意腩碎，够腍够入味又冇咁易摄牙罅，如果偏好大大旧牛腩就要慎选。墙上写有款𩠌叫「虾条」，实物系类似鱼腐卷嘅条状鱼蛋。饮品有罐装有盒装，收费十蚊八蚊有找，自己喺门口冻柜攞咗叫老板记番数就ok。以牛池湾墟嘅嗱渣程度嚟讲，呢间舖亦相对衞生。