滿小館

营业中

休息中

巧手中菜馆，款式多、质素高、价钱亦合理，环境宽敞舒适。酸辣凤爪并千叶/ 葱油海蜇头呢两款餐前小食都系我好钟意，呢度都整得几出色。凤爪无骨，酸辣味好足；海蜇头好爽口，以葱油调味好香。怀旧虾凤尾虾多士 - 上层弹牙，下层酥脆，整体口感丰富，而且有凤尾虾嘅香味。八味金砖 - 外层金黄香脆，调味得好惹味，内层则好嫩滑。唔会太厚粉，亦唔会好易散。冰镇甜酸猪爽肉 - 冰镇猪爽肉外冷内热，咬落口感弹牙。酱汁甜甜酸酸，再加上其他水果，都几开胃。黄金海虎虾 - 虎虾啖啖肉，虾肉都几弹牙。以咸蛋黄烹煮零舍香口惹味。脆皮牛坑腩 - 相对有点干，但牛味几浓郁。嫩滑酸菜鱼 - 卖相亦都几靓。鱼片嫩滑，唔腥。系少酸少辣嘅味道。其他配料仲有豆卜、豆芽、米线，份量绝对唔少。两碗老火汤 - 茶树菇炖竹丝鸡汤/ 松茸准杞炖螺头汤，火候同汤料都好足。呢度嘅甜品系几有惊喜，印象好深刻。最喜欢杨枝甘露同椰香鲜芒卷，非常推荐。