Isaac Toast (新城市廣場三期) (已結業)

近排天气寒冷，不时想起喺韩国住个暖笠笠三文治边行街边食。近日系网上知道呢间韩国人气店进驻咗新城市，即刻黎朝圣一番。幸运地较早黎到，唔使排咁耐，即时柯打返两件先。因为系即点即整关系，所以都要再等10~15分钟，但附近好多新铺开业，时间话咁快就。热溶芝士超级吐司。入面有素肉／牛油果／烟肉／酸萝卜/煎蛋，同埋厚厚嘅车打芝士&忌廉芝士。因为吐司经过烘烤，所以入口先香脆后松软，味道酸甜夹杂，再加上烟肉嘅咸脆及几可乱真嘅素汉堡肉，真系十分滋味。而且份量又丰富，不愧系国民早餐。烟肉薯饼超级吐司。因为天气冻闗系，始终有啲高淀粉质同热量嘅食物先觉得安心。入有大大个薯饼／烟肉／双重芝士／酸萝卜／粟米／牛油果及煎蛋。拎上手重量十足。滋味程度同热溶芝士不相伯仲，但中间嘅炸薯香味，喺寒冷环境更觉突出。真系无得弹。有肴当然要配饮品，爱文芒果汁／云呢嗱奶昔。芒果汁香甜顺口，打得够幼滑所以饮落芒果香味更出。中间仲有啲芒果纤维，证明真材实料。云呢嗱奶昔比想像中甜，但打得同样幼滑，配上烟肉薯饼超级吐司真系最佳拍档。可以清咗多余嘅肥腻感。虽然定价有啲贵，但吐司质素有返咁上下，间中食一食都系唔错选择。